කාන්තා, ළමා කටයුතු හා සමාජ සවිබලගැන්වීමේ අමාත්‍යාංශයේ අංශ/ නියෝජිතායතනය මගින් සිදු කරනු ලබන උපදේශණ සේවා.

කාන්තා, ළමා කටයුතු හා සමාජ සවිබලගැන්වීමේ අමාත්‍යාංශයේ අංශ/ නියෝජිතායතන කිහිපයක් මගින් උපදේශන සේවා සපයනු ලැබේ. මෙම සේවාවන් යටතේ ළමා, කාන්තා සහ පවුල් ඉලක්ක කරගත් උපදේශන සේවා, දැනුවත් කිරීම් සහ යොමු කිරීම් සිදු කෙරේ.

• ජාතික ළමා ආරක්ෂක අධිකාරිය හරහා ළමා කේන්ද්‍රීය මනෝ සමාජීය ආධාර සේවා.
• ශ්‍රී ලංකා කාන්තා කාර්යාංශය හරහා කාන්තා සහ පවුල ඉලක්ක කරගත් උපදේශන සේවා.
• සෑම වසරකම ඔක්තෝබර් 10 දිනට යෙදෙන මානසික සෞඛ්‍ය දිනය නිමිත්තෙන් වැඩසටහන් පවත්වනු ලැබේ.
• උපදේශන ඒකකය හරහා සිදු කරන උපදේශන සේවා.

කාන්තාවන් සඳහා ආරක්ෂිත නිවාස

ගම්පහ, මොණරාගල, රත්නපුර, කොළඹ, මඩකලපුව, අනුරාධපුර, මාතර, යාපනය, මුලතිව් සහ අනුරාධපුරය යන දිස්ත්‍රික්කවල කාන්තා ආරක්ෂාව සහ අයිතීන් තහවුරු කිරීමේ අරමුණින් තාවකාලික කාන්තා නිවාස 10ක්  පවත්වාගෙන යනු ලැබේ.

ගෘහස්ථ ප්‍රචණ්ඩත්වයට සහ ලිංගික අතවරවලට ගොදුරු වූ කාන්තාවන් පොලිසිය, රෝහල් සහ අධිකරණ නියෝග මගින් මෙම ආරක්ෂිත නිවාස වෙත යොමු කරනු ලැබේ. වින්දිත කාන්තාවන් සමාජගත වීමෙන් පසු ඔවුන් ආර්ථික වශයෙන් සවිබල ගැන්වීම සඳහා නේවාසික රැකවරණ කාලය තුළ ස්වයං රැකියා පුහුණුව ලබා දේ. එමෙන්ම සමාජගත වූ පසුවත් පසු විපරම් සිදු කරනු ලැබේ.

උපකාරක සේවා

1929 – ළමා උපකාරක සේවාව

ළමා අපයෝජන සම්බන්ධයෙන් මහජන පැමිණිලි භාර ගැනීම මෙහි ප්‍රධාන අරමුණයි. මෙමගින් කායික, මානසික, ලිංගික අපයෝජන සහ නොසලකා හැරීම් සම්බන්ධ මහජන පැමිණිලි දින හත තුළ පැය 24 පුරාම භාරගනු ලැබේ. මෙය දරුවන්ට ළමා කේන්ද්‍රීය මනෝ සමාජීය සහය සපයයි.

1938 – කාන්තා උපකාරක සේවාව

පැමිණිලි මධ්‍යස්ථානයේ ක්‍රියාකාරිත්වය කාර්යක්ෂමව පවත්වාගෙන යාම සඳහා ජාත්‍යන්තර කාන්තා දින සැමරුම සමඟින් 2013 මාර්තු 08 වන දින කාන්තා උපකාරක දුරකථන අංක 1938 ආරම්භ කරන ලදී. 1938 කාන්තා උපකාරක දුරකථන අංකය පැමිණිලි මධ්‍යස්ථානය සමඟින් ව්‍යාප්ත කරන ලද අතර, කාන්තාවන්ට එරෙහි ප්‍රචණ්ඩත්වය, අසාධාරණකම්, වෙනස් කොට සැලකීම් සහ අයිතිවාසිකම් උල්ලංඝනය කිරීම්, ලිංගික අතවර සහ සයිබර් අපරාධ ඇතුළු විවිධ පැමිණිලි සඳහා කාර්යාල වේලාවන් තුළ සහන සලසා දෙන ලදී.

ස්ත්‍රී පුරුෂ සමාජභාවය පිළිබඳ පැමිණිලි මධ්‍යස්ථානය

මෙම මධ්‍යස්ථානය 1999 දී ආරම්භ කරන ලද්දේ ස්ත්‍රී පුරුෂ සමාජභාවය පදනම් කරගත් වෙනස්කම් කිරීම්, අසාධාරණයන් සහ අයිතිවාසිකම් උල්ලංඝනය කිරීම් පිළිබඳ පැමිණිලි භාර ගැනීම, ඒවා විමර්ශනය කිරීම සඳහා රාජ්‍ය හා රාජ්‍ය නොවන ආයතන වෙත යොමු කිරීම, නීති ආධාර, උපදේශනය ඇතුළුව අවශ්‍ය අවස්ථාවලදී විසඳුම් ලබාදීම සහ සහන සැලසීම සඳහා ය. කාර්යාල වේලාවන් තුළ පුද්ගලිකව, ලිපි මගින්, විද්‍යුත් තැපෑලෙන් හෝ දුරකථනයෙන් පැමිණිලි භාර දිය හැකිය.